شركة أبل للتجارة العامة والمقاولات تأسست سنة 1976 واستطاعت أن تغزو العالم بأسره من خلال الأجهزة المتطورة الجميلة, ومن الأجهزة اللي اطرحوها بالسوق الآيفون والآيباد وماكنتوش الخ الخ ما كنت متصور ولا متخيل ولا متوقع ولا معتقد ولا مقتنع ولا مر على بالي انه في يوم من الأيام ينزل جهاز صغير بالكويت تستخدمه بالهز وtouch وتقدر اتنزل فيه العاب وبرامج واتدش على النت منه وتكلم أمك وربعك وزوجتك منه .الآيفون شي خيالي تقدر تحصل على أي معلومة تبيها في كل مكان وزمان وانت في السيارة وانت في الطيارة وانت بالحداق وواحد من اللي قاعدين يمك شكيت انه قاعد يشلخ و يجذب ويجادل (طبع الكويتيين) دش على الفانوس السحري (الآيفون) وسكته مع اني متأكد انه ما راح يسكت.
المشكلة ان الآيفون سعره شوي غالي (بس سعره فيه)يعني مو أي واحد يقدر يشتريه الا الموظف والمشكلة الأكبر أنه منتشر بين المراهقين وطلبة الثانوية ويمكن المتوسطة بعد خو كل شي يصير بالكويت.
انيي حق الماكنتوش اللي هو لابتوب من صنع عيال أبل هذا اللابتوب حسب معرفتي و بحثي عنه انه سعره أغلى من اللابتوبات الثانيه خصوصا انه مو بنفس المواصفات مواصفاته أقل بوايد من باجي اللابتوبات وهذا اللابتوب حق واحد مصمم أو مهندس شبكات الخ الخ بس اللي معقدني هذا اللي يشتري اللابتوب وأقصى شي يسويه أنه يدش يقرا الجرايد أو يلعب جنجفة أو يدش يقرا ايميله ويمكن محد يدزله ايميل ويمكن ما يحتاج الايميل بس ضرورة الكشخة وانك تكون كوول وعشان تصير كووول لازم يصير عندك ايميل وآيفون و ماكنتوش ونظارة ريبان ومسباح كهرب وسيارة السيرفس مالها كثر معاشي اذا مو أكثر.
اللهم أوسع علي من رزقك الحلال
أزال أحد مشرفي المدونة هذا التعليق.
ردحذف